ຕິດຕາມຮັບຟັງສະພາບການເກັບກໍາຂໍ້ມູນແມ່ຍິງຖືພາ ແລະ ເດັກນ້ອຍເກີດໃໝ່ໃນບັນດາບ້ານເປົ້າໝາຍ ຂອງອາສາສະໝັກສາທາລະນະສຸກຂັ້ນບ້ານຕັ້ງແຕ່ເລີ່ມຕົ້ນໂຄງການຈົນເຖິງປັດຈຸບັນ

ອສບ ຫຼື ອາສາສະໝັກສາທາລະນະສຸກຂັ້ນບ້ານ ຄືຜູ້ທີ່ເຮັດວຽກຕິດແທດກັບປະຊາຊົນໂດຍກົງ, ຄືຜູ້ທີ່ຂັບເຄື່ອນບັນດາກິດຈະກໍາ, ເປັນຜູ້ຢູ່ເບື້ອງຫຼັງຜົນສໍາເລັດວຽກງານດ້ານສາທາລະນະສຸກຢ່າງແທ້ຈິງ
ໃນລະຫວ່າງວັນທີ30 ສິງຫາ – ທີ8 ກັນຍາ ທີ່ຜ່ານມາທາງໂຄງການເທື່ອລະກ້າວເຊິ່ງປະສານສົມທົບກັບຂະແໜງການສາທາລະນະສຸກເມືອງໂພນໂຮງ, ເມືອງວຽງຄໍາ ແລະ ເມືອງວັງວຽງ ໄດ້ລົງຕິດຕາມຮັບຟັງສະພາບການເກັບກໍາຂໍ້ມູນແມ່ຍິງຖືພາ ແລະ ເດັກນ້ອຍເກີດໃໝ່ໃນບັນດາບ້ານເປົ້າໝາຍ ຂອງອາສາສະໝັກສາທາລະນະສຸກຂັ້ນບ້ານຕັ້ງແຕ່ເລີ່ມຕົ້ນໂຄງການຈົນເຖິງປັດຈຸບັນ ເຫັນໄດ້ວ່າໃນການເກັບກໍາແມ່ຍິງຖືພາຂອງທັງ 3 ເມືອງແມ່ນພົບກັບບັນຫາ ແລະ ສິ່ງທ້າທາຍທີ່ຄ້າຍໆກັນໂດຍສະເພາະແມ່ນແມ່ຍິງຖືພາມັກບໍ່ໄປຝາກທ້ອງ, ບໍ່ເປີດເຜີຍວ່າຕົນເອງຖືພາ, ເວລາໃນການເກັບກໍາຂໍ້ມູນບໍ່ຕົງກັນ, ເລື່ອງສະພາບເສັ້ນທາງ ແລະ ດິນຟ້າອາກາດບໍ່ອໍານວຍໃນການລົງພື້ນທີ່.
ເຖິງຢ່າງໃດກໍ່ຕາມທາງ ອາສາສະໝັກຂັ້ນບ້ານກໍສາມາດແກ້ໄຂບັນຫາສະເພາະໜ້າໄດ້ເປັນຢ່າງດີສາມາດລາຍງານຂໍ້ມູນ ແລະ ຕິດຕາມແມ່ຍິງຖືພາພາຍໃນພື້ນທີ່ຂອງຕົນໄດ້ເປັນຢ່າງດີ ແລະ ຍັງສືບຕໍ່ພາລະໜ້າທີ່ຂອງຕົນເອງເພື່ອສຸຂະພາບຂອງແມ່, ເພື່ອສຸຂະພາບຂອງເດັກ ແລະ ເພື່ອທີ່ຈະຫຼຸດຜ່ອນການສົ່ງເຊື້ອຈາກແມ່ສູ່ລູກ